Այսօր կառավարության նիստին էկոնոմիկայի նախարար Տիգրան Խաչատրյանը ներկայացրեց նախագիծ, որը նախատեսում է խրախուսել շրջանառու ջրի օգտագործումը: «Արարատյան դաշտավայրում, որտեղ կան 116 ջրօգտագործող ձկնաբուծական տնտեսություններ, նախատեսվում է սահմանել այնպիսի կարգավորումներ, որոնք կապի մեջ են դնում օգտագործված ջրի քանակը եւ այդ ջուրը օգտագործելու արդյունքում արդյունաբերական արտադրանքի քանակը, տվյալ դեպքում՝ ձկան արտադրության քանակը»,- ասաց նա:
Նախարարը ներկայացրեց լիզինգային ծրագիրը, որը հնարավորություն կտա ջուրը ավելի արդյունավետ օգտագործել:
Շրջակա միջավայրի նախարար Էրիկ Գրիգորյանը նշեց, որ նոր թույլտվություններ չեն լինելու եւ մոնիթորինգ է իրականացվելու:
Վարչապետ Նիկոլ Փաշինյանը ասաց, որ ձկնաբուծությունը տնտեսության կայացած ճյուղերից մեկն է եւ այս ոլորտում ռիսկեր եւ խնդիրներ ունեցել են. «Ընտրությունը հետեւյալն է՝ ասենք արտեզյան ավազանի վրա խաչ ենք քաշում, որը չենք կարող անել, կամ ձկնաբուծության վրա ենք խաչ քաշում, որը էլի չենք կարող անել, քանի որ երկու դեպքում էլ հարվածում ենք տնտեսությանը: Դրա համար պետք է քայլ առ քայլ գնալ եւ հավասարակշռել: Մեր կուրսը շատ հստակ է. մենք աջակցելու ենք տեղական արտադրողներին բոլոր ոլորտներում՝ մեկ պայմանով՝ համոզվելով, որ դրանց մրցունակությունն ենք ավելացնում, ոչ թե նստեցնում ենք աջակցության թմրանյութի ասեղի վրա, այլ օգնում ենք, որ լինեն առավել ինովացիոն, մրցունակ, արդյունավետ: Մենք այս ոլորտում շատ լուրջ խնդիր ունենք, բայց եթե փորձեն մի քայլով խնդիրը լուծել, հոնքի տեղը աչքը կհանենք»,- ասաց վարչապետը եւ նշեց, որ ընկերությունները պետք է բարձրացնեն արդյունավետությունը, որակը, մրցունակությունը: «Իքս պահ պետք է գա, որ եթե ձկնաբուծարանները չհամապատասխանեն չափանիշներին, պիտի փակվեն: 2023 թիվը վերջին ժամկետն է, որ այս խնդիրը պետք է լուծված լինի, սա չի կարող հավերժ տեւել»,- ասաց վարչապետը: