Արդեն հինգերորդ տարին Սևանի հյուրընկալ ափին անցկացվում է Սպարտա ամենամյա մարզահավաքը, որին մասնակցում է Տեզուկա գրուպ կարատեի ճապոնական ֆեդերացիայի հարյուրավոր սան:
Ինչպես «Արմենպրես»-ի հետ զրույցում նշում է ֆեդերացիայի նախագահ Անդրանիկ Թորոսյանը, մտահղացումն առաջին անգամ իրականացվել է 5 տարի առաջ, երբ Սևանի ափին ապրելու կամ գիշերելու մասին միտքը մի փոքր խենթ էր թվում : Այս տարի արդեն մարզահավաքը հաջողված կերպով անց է կացվում 5-րդ անգամ և հյուրընկալել է ավելի մեծ քանակով մասնակիցների, քան նախորդ տարիներին էր: Կապուտակ Սևանի կողքին մարզվում, ոգեշնչվում և հանգստի անմոռանալի օրեր են անցկացնում Կիոկուշին կարատեի Տեզուկա գրուպ ֆեդերացիայի մարզիկները , իսկ առաջիկայում ամառային ճամբարը հյուրընկալելու է նաև ոճը ներկայացնող արտերկրի մարզիկների, ինչպես նաև սպորտասերների, ովքեր պարզապես ցանկանալու են առողջ ու բնությանը հնարավորինս մոտ տասը օր անցկացնել:
Մարզահավաքն այս տարիների ընթացքում հասցրեց այնքան սիրվել, որ Սևանի կանաչելու և ջրի աղտոտվածության մասին խոսակցություններն անգամ չխանգարեցին օտարերկրացի մարզիկներին մասնակցության հայտեր ուղարկելու:
Ֆեդերացիայում միաբերան նշում են, որ ծրագիրը շարունակելու է կյանքի կոչվել ու ամեն տարի Հայաստան բերել ավելի ու ավելի մեծ թվով սպորտասերների:
