Ազնավուրի հետ աշխատած կամ թեկուզ մի քանի ժամով շփված մարդիկ միշտ տպավորված են լինում եւ պատմելու շատ բան են ունենում երգչից, իսկ ինչքան հիշողություններ կունենա նրա դուստրը: Սեդա Ազնավուրը Փարիզ է ժամանել Շառլ Ազնավուրի ծննդյան 95-ամյակին նվիրված համերգին երգելու համար: Երգարվեստից հեռացած արտիստն այսօր կրկին բեմ կբարձրանա` հորը հարգանքի տուրք մատուցելու համար: Իսկ մինչ այդ եկել էր նրա մեղեդիները վայելելու «Classic Aznavour» տրիոյի կատարմամբ, որի ավարտին էլ հանդիպեցինք նրան: Մաեստրոյի երգերի կատարումներն այս տրիոյի կատարմամբ մեծապես հուզել էին երգչի դստերը, կատարումներն էլ շատ էր հավանել.
– Ֆանտաստիկ էր: Պահեր կային, որ շատ հուզվեցի, այնքան հիշողություններ կան` կապված հորս երգերի հետ. երգերի ստեղծումը, Կառվարենցի հետ աշխատելը, երբ նա գալիս էր, ու երգերի տեքստեր էին քննարկում: Ամեն երգ մի հիշողություն է:
Դժվար է նրա երգերը լսելը, բայց առավել դժվար կլինի երգելը: Հուսով եմ` բեմում լաց չեմ լինի. պրոֆեսիոնալ չէ: Ինչքան էլ ինձ ուրախացնում է, երբ կատարում են նրա երգերը, փշաքաղվում եմ ամեն անգամ, որովհետեւ տեսնում եմ նրան:
Պատկերացնում եմ` որքան եք կարոտում Ձեր հորը: Ինչպե՞ս եք կարողանում փոքր-ինչ լցնել նրանից հետո մնացած դատարկությունը:
– Ինձ Ֆեյսբուքն է օգնում. նրանից լուսանկարներ եմ հրապարակում եւ այդպիսով ապրում եմ իր հետ: Փնտրում եմ ինչ-որ բաներ, որոնք այդքան էլ հայտնի չեն, հայտնի ու անհայտ լուսանկարներն եմ նայում, կիսվում եմ նրա երկրպագուների հետ եւ ինձ լավ եմ զգում: Մարդիկ կան, դա չեն հասկանում, բայց ինձ համար այդպես նա ողջ է, միայն նրան կենդանի պահելով եմ կարողանում հաղթահարել կարոտս: Չեմ ուզում նրան մահացած պատկերացնել, չնայած` նա «չի մահանա»: Հաճախ լաց եմ լինում, երբ իրենից ինչ-որ տեսանյութեր եմ գտնում, օրինակ, երբ հայերեն է խոսում: Միեւնույն ժամանակ զվարճանում եմ, երբ լսում եմ` ինչպես էր հայերեն խոսում:
Ամբողջական նյութը` սկզբնաղբյուրում